ӘЛЕМДІК ТҰЛҒАЛАРДЫҢ МҰХАММЕД ЖАЙЛЫ ТОЛҒАУЛАРЫ
Алла елшісінің (оған Алланың салауаты мен сәлемі болсын) мінезі Құран еді. Исламға үндеу жолы көркем мінез болды. Ол адамдардың жүрегін махаббат және мейіріммен жаулады. Өз жұрты оны "Шыншыл", "Аманатшыл" деп атады. Тектіден туған текті деп білді.
Өмірбаянын зерттеген батыс пен шығыс ойшылдары мен ғалымдары оның тұлғасына құрметпен бас иді. Адамзат тарихында есімін алтын әріппен жаздырған тұлғалар ішінде барлығынан оқ бойы озық тұрды. Үндістанның азаттық қозғалысының жетекшісі Махатма Ганди: «Ешбір күшсіз миллиондаған адамның жүрегін жаулаған кісінің қасиеттерін танып білгім келеді. Исламның мұндай биік мәртебеге жетуінде қолданған әдісі қылыш емес екеніне толықтай көзім жетті. Ол әдіс Пайғамбардың қарапайымдылығы және уәдесіне беріктігі. Жолдастары және ілесушілеріне деген ықыласы мен шынайылығы. Раббысының миссиясын жеткізудегі батылдығы. Қылыш емес, осы қасиеттер оның жолын ашып, қиыншылықтарды жеңді. Пайғамбар өмірбаянының екінші бөлігін оқып тәмамдағанда ол жайлы тағы көбірек біле алмағаным үшін бір өкініш барын сезіндім»,-деп жазады.
Майкл Харт «Жүздік. Тарихта ықпалды тұлғалар тізімі» кітабының авторы. М.Харт кітабында: «Мұхаммед тарихта қос бағытта: дін және мемлекет саласында айқын жетістікке жеткен жалғыз қайраткер. Ол ешбір теңдесі жоқ дін мен мемлекеттің дара одағын құрды. Бұл жетістігі оны адамзат тарихында ең ұлы тұлғаға айналдырады», - деп ой толғайды. Автор сөзін жалғастырып: «Тарихтағы тұлғалардың ең көрнектісі және ұлысы Мұхаммед деп таңдауым оқырмандарды таң қалдыруы мүмкін. Алайда, ол адамзат тарихында дін және мемлекет бағытында ең биік жетістікке жеткен жалғыз тұлға», - деп жазады. М.Харт: «Адамзатқа үлкен миссиямен келген елшілер мен пайғамбарлар көп болды. Кейбіреуі Иса сияқты міндетін тәмамдамай дүние салды, кейбірі Мұса сияқты миссиясында басқа пайғамбармен серік болды. Ал, Мұхаммед діни миссиясын толық тәмамдады. Дін үкімдерін белгіледі. Көзі тірісінде халқы толықтай оған иман етті», - дейді.
Ирланд жазушысы Бернард Шоудың «Мұхаммед» атты туындысы бар. Жазушының бұл еңбегін Англия үкіметі өртеп жіберген. Автор: «Әлем Мұхаммед сияқты ойлайтын тұлғаға мұқтаж. Бұл пайғамбар діні құрмет пен сыйластыққа негізделген. Барлық діндер арасында ең қуатты дін осы. Мәңгілікке осылай қала бермек. Мен ұлтымның көптеген перзенттері осы дінді айқын дәлелмен көріп кіріп жатқанына куә болдым. Бұл құрлықта (еуропада) осы дін өзінің алаңын тапады деп ойлаймын», - деген екен.
Л.Толстой: «Шайтани ұсқынсыз әдет-ғұрып тырнағынан қанжоса болған ұлтын құтқаруы Мұхаммедке мақтаныш ретінде жетіп артылады. Ол ұлтына дамудың жолын ашып берді. Мұхаммедтің шариғаты ақыл және даналықпен үйлесім тапқандықтан әлемді билейтін болады», - деп айтқан екен.
Алман философы Карл Маркс: «Бұл пайғамбар өз миссиясын білім және таныммен бастады. Оның сөздері мен жұмыстары ғылыми әдісте зерттеуге лайықты. Оның бұл тәлімдері иләһи уахиге негізделген. Ол бұдан алдынғы өзгеріс пен бұрмалауға ұшыраған пайғамбарлық миссияларды жоқ ете алады»,-деген екен.
Тұлғалар тәнті болған Адамзат Ардақтысы Мұхаммед Пайғамбарымызға Алланың салауаты мен сәлемі болсын.
Гүлзира Жидебай
Алматы орталық мешітінің баспасөз хатшысы
 Предыдущий |
Следующий |
| ҚЫРЫҚ ҚАСИЕТІ БАР ДҰҒА | ГИВ ОЙНАТУҒА БОЛА МА? |
Қызықты тақырыптар
Намаз уақыттары 
