АЛМАТЫ: МЕШІТ ҚЫЗМЕТКЕРЛЕРІНЕ АЛҒЫС АЙТЫЛДЫ
![](/media/images/621e04a70160a.jpg)
Алматы қаласының бас имамы Төлеби Дәділұлының бастамасымен қала мешіттерінде ұзақ жылдар қызмет етіп келе жатқан ұстаздар мен тазалықшы әйел қызметкерлерге алғыс хаттар үлестірілді.
Алғыс айту күніне орай Алматы қаласының бас имамы Төлеби Дәділұлының құттықтау сөзін Орталық мешіттің наиб имамы Ержан Есім жеткізіп, қала мешіттерінде ұзақ жылдар қызмет етіп келе жатқан әйел ұстаздар Рәзия Темірбекова, Лейла Рысаков, Лейла Серікбайқызына алғысын айтты. "Құранның алғашқы аяты білімге үндейді. Білім – екі дүние бақытының кілті. Ұлт ұстазы Ахмет Байтұрсынұлы: «Ұлттың ұлағаты — мәдениетте, мәдениеттің ұлағаты — оқу мен әдебиетте», — дегендей Қазақстан мұсылмандары діни басқармасы бекіткен 7 бағыттың бірі – Діни білім және ғылым. Ұстаз – білім мен мәдениетке жетелейтін бірден бір тұлға. Ұлттың рухани тәрбиесінде ұстаздың біліктілігі және жауапкершілігі, адами қасиеттерінде өте маңызды рөл атқарады. Себебі, ұстаз шәкірт үшін айна сияқты. Ұстазы жақсының шәкірті үздік.
Ардақты пайғамбарымыз (с.ғ.с): «Ақиқатында, мен мұғалім (үйретуші) етіп жіберілдім» деп басты мақсатын айтқан. Сіз мешіт қабырғасында құран құндылықтары мен хадис хикметтерін үйретудесіз. Бұл абыройлы да, ауыр қызметті табысты да жемісті атқарудасыз. Сіз шәкірт тәрбиелеуде ұзақ жылдар қажырлы еңбек етіп, діни маман даярлауға сүбелі үлес қосып келе жатқан білікті ұстазсыз. Сізге діни сауат ашу бағытындағы ыждаһаттылығыңыз үшін шынайы алғыс білдіремін.
Алла Тағала әрдайым жақсылықтың жаршысы болуды жазғай. Отбасыңызға амандық, деніңізге саулық және өміріңізге береке тілеймін. Ел игілігі үшін атқарып жүрген қызметтеріңізге Жаратқан Ием жар болып, мерейіңіз үстем болғай! Әумин!", - делінген алғыс хатта.
Келесі алғыс хаттар қала мешіттері мен Орталық мешітте ұзақ жылдар шаруашылық-тазалық жұмыстарын ыждаһатпен орындап келе жатқан Жұмакерім Ибаққызына, Зілия Ильясқызына, Бекзия Мұратқызына және Гүлманат Ерғалиқызы, Раушан Сейіткенова, Гүлнафис Жұманқызына берілді. "Ислам – тазалық діні. Тазалық – құлшылыққа баспалдақ. Жүрек тазалығы – мешіттің мұнтаздай тазалығынан бастау алады. Құран Кәрімде Алла Тағала: «Менің үйімді (мешітті) оны тауап ететіндер, онда қиямда тұрып, рукуғ жасап, әрі сәжде етіп құлшылық ететіндер үшін таза ұста» деп әмір етеді. Ардақты пайғамбарымыз (с.ғ.с.): «Қала ішінде Аллаға ең ұнамды жер – мешіттер» деп мәні мен мағынасы терең ой айтқан. Өйткені, мешіт біздің қоғамның рухани дамуында маңызды рөл атқарады.
Сіздің мұсылманның миғражы есептелетін намазды кемеліне жеткізіп оқуда еңбегіңіз өлшеусіз. Мешітке құлшылық етуге һәм Құран құндылықтарын үйренуге келуші әрбір азаматқа қолайлы жағдай жасаудасыз. Хәкім Абай «Сен де бір кірпіш дүниеге, кетігін тап та, бар қалан» дегеніндей ұзақ жылдар мешіт қызметіне қосып келе жатқан үлкен үлесіңіз үшін ұжым және жамағат атынан алғысымды білдіремін. Алла Тағаладан сізге денсаулық, отбасыңызға амандық, қайырлы ғұмыр тілеймін!", - делінген алғыс хатпен бірге Құран Кәрім, гүл шоғы мен сыйақы ұсынылды.
Алматы Орталық мешітінің баспасөз қызметі