ЕЛОРДА: АЛМАТЫ ӨКІЛДІГІ ҚАЙЫРЫМДЫЛЫҚ БАҒЫТЫНДА ҮЗДІК ДЕП ТАНЫЛДЫ
![](/media/images/61c44589ec9b3.jpg)
Елордада Қазақстан мұсылмандары діни басқармасының Орталық аппаратында өткен Төралқа мәжілісінде Бас мүфти Наурызбай қажы Тағанұлы Тәуелсіздігіміздің 30 жылдық мерейтойына орай облыс имамдарын арнайы алғыс хатпен марапаттады.
«Сіздің асыл дініміздің өсіп-өркендеуіне, тәуелсіз еліміздің 30 жылдық мерейлі белесінде жеткен әрбір жетістігіне қосқан үлесіңіз мол. Рухани құндылықтарымызды насихаттау жолындағы белсенді қызметіңіз бен ыждаһатты еңбегіңіз үшін Сізге айрықша алғысымды білдіремін. Алла разы болсын! Отбасыңызға амандық, деніңізге саулық, ізгі ісіңізге береке тілеймін!
Алла Тағала дін саласында ықыласпен атқарған әрбір ісіңізге мол сауаптан жазғай. Жаратушы Жаббар Иеміз Тәуелсіздігімізді баянды етіп, халқымызға бірлік пен береке нәсіп еткей. Әмин!» делінген Бас мүфтидің алғыс хатында.
Төралқа мәжілісінде ҚМДБ Төрағасы Наурызбай қажы Тағанұлы бір жыл бойы жақсы жұмыс нәтижесін көрсеткен барша дін қызметкерлеріне алғысын жеткізді. Жемісті қызмет істеп, жұмыстың жеті бағыты бойынша үздік нәтиже көрсеткен имамдар, дін қызметкерлері анықталды. Жеті бағыттың қайырымдылық бағыты бойынша Алматы өкілдігі үздік деп танылып, бас имам Төлеби Дәділұлы арнайы марапатталды.
«Қайырымды, қайырым етпес есеппен, есе күтсең, – ұрғанмен тең кесекпен» демекші, Алматы мешіттері қайырымдылық шараларын атқаруда белсенділік танытып, өкілдік бекіткен жоспарды орындауда өзге әріптестерге үлгі бола білді. Мұқтаж жандардың риясыз алғысына бөленуді Алла нәсіп етсін! Марапат құтты болсын!
Алматы Орталық мешітінің баспасөз қызметі