БАС МҮФТИ АЛМАТЫДАҒЫ «ӘЛИ-МҰХАММЕД» МЕШІТІНІҢ АШЫЛУЫНА ҚАТЫСТЫ
Бүгін, қасиетті жұма күні Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының қатысуымен Алматы қаласы, Жетісу ауданындағы «Әли-Мұхаммед» мешіті күрделі жөндеуден өтіп ел игілігіне берілді.
Игі іс-шара қасиетті Құран аяттарымен ашылып, Бас мүфти еліміз бен жеріміздің тыныштығы үшін арнайы дұға жасады.
«Исламда мешіт салу – ең ұлы әрі үздіксіз сауабы жалғасатын сауапты амалдардың бірі. Мешіт – Алланың үйі, иман мен ізгіліктің ордасы, қоғамның рухани тірегі. Пайғамбарымыз (оған Алланың салауаты мен сәлемі болсын) былай деген: «Кімде-кім Алла разылығы үшін мешіт салса, Алла оған жәннатта сондай үй салып береді».
Бұл хадис мешіт салудың тікелей жәннатқа себеп болатын амал екенін көрсетеді.
Мешіт салу садақа жарияға жатады. Адам қайтыс болғаннан кейін де мешітте оқылған әр намаз, әр Құран, әр зікір, әр ілім үйрену – соның сауабы мешіт салуға үлес қосқан жанға барып тұрады. Бұл жайында Пайғамбарымыз (оған Алланың салауаты мен сәлемі болсын): «Адам қайтыс болғанда оның амал дәптері үш нәрседен басқа жабылады: садақа жария, пайдалы ілім, дұға ететін ізгі ұрпақ». Мешіт – осы үш сауаптың да жинақталған орны», - деді Бас мүфти.
Шара барысында Бас мүфти Наурызбай қажы Тағанұлы мешітті қайта салуға демеушілік жасаған кәсіпкерлерге алғыс білдіріп, қазақи дәстүр бойынша иығына шапан жапты.
Естеріңізге сала кетейік, Бас мүфти Наурызбай қажы Тағанұлының бастамасымен Алматы қаласындағы көне мешіттердің жерін кеңейтіп, орнына заман талаптарына сай, жамағатқа қолайлы жаңа мешіт ғимаратын салу жобасы қолға алынған болатын. Осы жоба аясында бұл салынған үшінші мешіт. Бұған дейін Әлмерек және Әбу Ханифа мешіттері кеңейтіліп, заманауи сипатта қайта салынған еді.
Айта кетейік, «Әли-Мұхаммед» мешіті күрделі жөндеу нәтижесінде сыйымдылығы 700 адамнан 5 000 адамға дейін ұлғайып, жалпы аумағы 7 есеге кеңейді.
Тақырып бойынша жаңалықтар
Қызықты тақырыптар
Намаз уақыттары 
