Алматы: Бас имам Құрбан айтқа арналған баспасөз мәслихатын өткізді
Бүгін Алматы қаласының бас имамы Төлеби Оспан қасиетті Құрбан айт мерекесінің қарсаңында Алматы қаласы өңірлік коммуникациялар қызметінде «Карантин кезінде Құрбан айт мерекесін атап өту» атты онлайн баспасөз мәслихатын өткізді.
Бұл онлайн басқосуға Алматы қаласы бойынша санитарлық-эпидемиологиялық бақылау департаментінің басшысы, қаланың бас мемлекеттік санитарлық дәрігері Жандарбек Бекшин, Алматы қалалық орталық мешітінің наиб имамы Руслан Қайыргелді, Алматы қаласы Дін істері жөніндегі басқармасы басшысының орынбасары Кошеке Ерғали және жергілікті БАҚ өкілдері қатысты.
Бас имам, ең алдымен, көпшілікті қасиетті Зүлхижжа айының кіруімен және күллі мұсылман жұртшылығы асыға күткен Құрбан айт мерекесімен құттықтады. Берекесі мол Арапа күнінің қадір-қасиетін айтып, осы күні ораза ұстаудың және құрбандық шалудың дініміздегі орны мен сауабына тоқталды. ҚМДБ Төрағасы, Бас мүфти Наурызбай қажы Тағанұлы хазреттің Нұр-Сұлтан қаласында өткен брифингте каранитн кезіндегі құрбан шалу жайлы жасаған мәлімдемесі мен Діни басқарма тарапынан қабылдаған карантиндік режимдегі құрбан шалудың жай-күйімен таныстырды.
Атап айтқанда, биыл да қаламыздағы эпидемиялық ахуалдың күшеюіне байланысты мешіттерде жамағатпен айт намазы оқылмайды, оның орнына әркім өз үйінде 2 ракат нәпіл намаз оқу ұсынылады. Былтырғы тәжірибеге сүйеніп, Бас мүфти бастамасымен карантин талаптарын ескере отырып, халықтың денсаулығын сақтау мақсатында Құрбан шалу шарасын өткізу үшін «QURBAN-2021» атты ОНЛАЙН қайырымдылық акциясы қайта қолға алынды. Бұл үшін арнайы "QURBAN2021.KZ" сайты қайта іске қосылып, қашықтан құрбан шалудың жөн-жосығы мен алгаритімі түзілген. Сонымен қатар аталған сайтты пайдалануға қатысты нұсқаулық-роликтер мен материалдар ҚМДБ-ның ресми сайттарында (muftyat.kz azan.kz қосымша жарияланған.
Сондай-ақ, бас имам Алматы өкілдігінде қашықтан шалу шарасын ұйымдастыру барысында көпшілікті сауалдарына жауап беру үшін арнайы Call-centеr қызмет ететіндігін хабарлады (Байланыс номері: 8727 329 09 66, 8778 382 88 36, ватцап номері: 8775 475 00 83).
Естеріңізге сала кетсек, Алматы өкілдігі бойынша қашықтан құрбан шалу ісін үйлестіретін жұмысшы тобын құрылған. Олар тапсырыс алудан бастап, мал сою, видео есеп жолдау, еттерді мұқтаж жандарға тарату сынды жұмыстарды жүргізеді. Сайт арқылы Құрбандық шалуға тапсырыс беру 15 шілдеден басталып, 22 шілде сағат 14.00-ге дейін жалғасады. Пандемияға байланысты қашықтан құрбан шалуға тапсырыс берушілерге құрбан еттері берілмейді, ол еттер толығымен мұқтаж отбасыларға жеткізіліп, үлестіріледі.
Онлайн жиын барысында карантин кезінде қашықтан құрбандық шалуға қатысты тілшілердің түрлі сауалдарына қаланың бас имамы Төлеби Оспан, наиб имам Руслан Қайыргелді және қаланың бас санитар дәрігері Жандарбек Бекшин кезекпен жауап берді.
Баспасөз мәслихатының видео нұсқасы: https://fb.watch/v/az-MKN40_/
Алматы қалалық орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
