ШАРАПАТЫ МОЛ ШАҒБАН АЙЫ
Наурызбай қажы ТАҒАНҰЛЫ,
ҚМДБ Төрағасы, Бас мүфти
Құрметті жамағат!
Баршаңызды шарапаты мол Шағбан айының келуімен шын жүректен құттықтаймын!
Қасиетті Рамазан айының келгенін сүйіншілейтін шағбанда әр шаңыраққа шаттық, бақыт пен береке тілеймін. Алла Тағала осы айда жасайтын дұға-тілектерімізді, құлшылық пен ізгі амалдарымызды қабыл еткей!
Ардақты Пайғамбарымыз (оған Алланың салауаты мен сәлемі болсын) өз үмбетін шағбан айы кіргенде ниетті түзеп, ізгі амал жасауға құлшындырған. Алла елшісінің (оған Алланың салауаты мен сәлемі болсын) хадис-шарифінде айтылғандай, шағбан айында жасалған дұға кері қайтарылмайды. Ендеше, шарапаты мол шағбан айында шынайы ниетпен дұға жасап, екі дүниенің бақытын тілеу ләзім.
Ізгі ғұламалардың бірі: «Ережеп – желге, Шағбан – бұлтқа, Рамазан жаңбырға ұқсайды. Ережеп айында дән егілмесе, Шағбанда суарылмаса, Рамазанда қандай егін күтуге болады», – деген. Осы айда ниетімізді түзеп, нәпіл ораза ұстап, мүмкіндігінше ізгі амал жасауға тырысайық. Құран оқып, жүрегізді нұрға бөлейік. Өйткені, ардақты Пайғамбарымыз (оған Алланың салауаты мен сәлемі болсын) «Құран оқу – көңілдің шипасы», – деген.
Алла Тағала елімізге амандық, жерімізге тыныштық, халқымызға береке нәсіп еткей. Жер бетіндегі барша мұсылман үмбетіне шағбанның шарапатына бөленуді жазғай!
Хақ Тағала шағбан айын берекелі етіп, баршамызды айлардың сұлтаны, қасиетті Рамазанға аман-есен жеткізгей! Әумин!
Тақырып бойынша жаңалықтар
Қызықты тақырыптар
Намаз уақыттары 
