«ОТБАСЫНДАҒЫ АДАЛДЫҚ ЖӘНЕ ЖАУАПКЕРШІЛІК» АТТЫ РУХАНИ КЕЗДЕСУ ӨТТІ
Түрксіб ауданында «Отбасындағы адалдық пен жауапкершілік» тақырыбында рухани кездесу өтті.
«Ислам және адал қоғам» жылы аясында Алматы қаласы Түрксіб ауданындағы Фирали Ферғанұлы мешітінде «Отбасындағы адалдық пен жауапкершілік» тақырыбында жамағатпен рухани кездесу ұйымдастырылды. Іс-шараның негізгі мақсаты – отбасы құндылықтарын насихаттау, қоғамдағы жауапкершілік мәдениетін қалыптастыру және ұлттық әрі діни тәрбиенің маңызын түсіндіру. Кездесуге Алматы орталық мешітінің наиб имамы Бекзат Оқапұлы арнайы қатысып, Ислам дініндегі отбасының орны, ерлі-зайыптылардың өзара міндеттері, ата-ананың бала тәрбиесіндегі жауапкершілігі және отбасылық татулықтың қоғам тұрақтылығындағы рөлі туралы тағылымды насихат айтты. Сонымен қатар, Наурызбай ауданы Қарағайлы мешітінің бас имамы, PhD докторант Ернар Қалмаханұлы отбасындағы ұлттық тәрбие мәселесіне тоқталып, қазақ халқының дәстүрлі отбасылық құндылықтары мен ұрпақ тәрбиесіндегі ұлттық дүниетанымның маңызы жөнінде мазмұнды баяндама жасады.
Шара барысында қатысушылар өздерін толғандырған сұрақтарға жауап алып, отбасы тәрбиесі, рухани құндылықтар және дін мен дәстүр сабақтастығы төңірегінде пікір алмасты. Кездесу соңында жамағатқа отбасы бірлігі мен қоғамдағы ізгілік қағидаларын нығайтуға бағытталған насихат айтылып, ел тыныштығы мен отбасы амандығы үшін дұға жасалды.
Тақырып бойынша жаңалықтар
Қызықты тақырыптар
Намаз уақыттары 
.jpg)
