БАС МҮФТИ ҚМДБ-НЫҢ 35 ЖЫЛДЫҒЫНА ОРАЙ БІРҚАТАР ЗИЯЛЫ ҚАУЫМ ӨКІЛДЕРІН МАРАПАТТАДЫ
Алматыда өткен «Діни басқармаға – 35 жыл» атты мерейтойлық рухани кеш барысында ҚМДБ төрағасы, Бас мүфти Наурызбай қажы Тағанұлы ел руханиятының дамуына үлес қосқан бірқатар тұлғаларды арнайы марапаттармен құрметтеді. Шарада Бас мүфти ҚМДБ-ның ең жоғары наградаларының бірі – «Шарапат» орденін Діни басқарманың қалыптасуы мен елдік руханиятқа айрықша еңбек сіңірген, әр жылдары Бас мүфти қызметін атқарған Рәтбек қажы Нысанбайұлы, Ержан қажы Малғажыұлы және Серікбай қажы Оразға табыстады.
Сонымен қатар, мерейтой аясында мәдениет, әдебиет, қоғам және ғылым саласында еңбек етіп жүрген бірқатар зиялы қауым өкілдері арнайы мерекелік медальмен марапатталды. Марапат иелерінің қатарында Қазақстан Жазушылар одағының төрағасы Мереке Құлкенов, ҚМДБ Ақсақалдар кеңесінің мүшелері, халық жазушысы Смағұл Елубай, қоғам қайраткері Марат Тоқашбаев, сондай-ақ ғалым-аудармашы Зәріпбай Жұманұлы бар.
Бұдан бөлек, діни білім мен ғылыми-зерттеу саласына елеулі үлес қосып келе жатқан «Нұр-Мүбарак» университетінің бірқатар ұстаздары да марапатталды. Атап айтқанда, «Әбу Ханифа» ғылыми-зерттеу орталығының директоры, профессор Керім Шамшәдин Тұрсынұлы, университет профессоры Али Рауыфұлы, ҚМДБ Ғұламалар кеңесінің мүшесі, университет профессоры Мұхитдин Исаұлы және профессор, PhD докторы Алау Әділбаев марапат иелері атанды.
Аталмыш марапаттар — еліміздің рухани өрісін кеңейтуге, діни-ағартушылық жұмыстарды жандандыруға және қоғамдағы ізгілік құндылықтарын нығайтуға үлес қосқан тұлғалардың еңбегіне көрсетілген жоғары құрметтің айқын көрінісі болды.
Тақырып бойынша жаңалықтар
Қызықты тақырыптар
Намаз уақыттары 
.jpg)
.jpg)
.jpg)
