Алматы қаласында «Ұлтымның ұятының айнасындай...» атты рухани кеш өтті
«Сен қазақ қызысың! Сені тәрбиелегеніміз, сен ұлтыңның әшекейі болсаң, ұят сенің ең үлкен әшекейің! Әрлі беттен арлы бет сұлу! Сен дүниеге әкелген, сен ақ сүт берген, сен тәрбие нәрін сепкен ұрпақ – ұлт болашағы!»
Алматы төрінде, ақпанның алғашқы сенбісінде өткен рухани кештің көтерген жүгі, ар сақтаған аруларымызға айтары осы еді. Қыз-келіншектерге арналған әдемі отырыстың ұйымдастырушылары – «Таугүл-3» мешіті, әйел-қыздар секторы, «Жәрдем» қайырымдылық қоры болды.
Бұл күні «шариғат шәлісінің» асқақтығы Алматыда ғана емес бүкіл дүние жүзінде паш етіліп жатты. Бірнеше жылдан бері орамал күні дүниежүзілік деңгейде атап өтіліп жүргендігі көңілге қуаныш ұялатады.
Жүзге жуық шыныдай шырайлы, гүлдей нәзік қыз-келіншектер жиналған кеш Алланың сөзін оқумен басталды. Мешіт шәкірттерінің бірі «Әр-Рахман» сүресін оқығаннан кейін ақ жаулықты анамыз ел тыныштығын тілеп, бата берді.
Танымдық сұрақтар мен білімді қонақтарға әзірленген сыйлықтар, мағыналы ойындар, терең ой салатын сахналық көріністер, арнайы әзірленген қызықты видеороликтер көпшілік көңіліне жол тапты. «San-dizain» сән орталығының дизайнерлері ұсынған «Ана мен қыз», «Бойжеткен» топтамаларынан сәндік көрсетілімдер ұйымдастырылып, залдағы орамал тағуға ниетті бойжеткендерге жарасамды үлгіде орамалдар тағып, сыйға берілді.
Құрметті қонақтар қатарында PhD, Нұр-Мүбәрак университетінің оқытушысы Шәмшат Әділбаева, Алматы қалсы әйел-қыздар секторының басшысы, Орталық мешіт ұстазы Гүлжан Жұлдызбай, блогер,журналист – Марфуға Шапиян, Нұр-Мүбәрак университетінің баспасөз хатшысы Айша Кеңесбай және т.б. мешіт ұстаздары болды.
Жастарға пайдалы тақырыпта көркем әңгіме айтқан Шәмшат ұстазға айтар алғысымыз мол. Сондай-ақ, бұл кеште «Жәрдем» қайырымдылық қорының жетекшісі, «Таугүл-3» мешітінің ұстазы Айнұр Игиликова сөз алып, қордың бір жылдық жұмысымен таныстырды. Айнұр ұстаз қорға мүше болған жас қыз-келіншктердің еңбегіне алғыс білдіріп, залдағы жастарды қорға мүше болу арқылы көптеген қайырымды іске себепші атануға шақырды.
Рухани кездесу барысында отансүйгіштік қасиет құны, қоғамға пайдалы болу, жастық шақты, өмірдің әрбір сәтін өкінбестей, барынша тиімді өткізу, болашақты жарқын қылу жолдары секілді аса өзекті мәселелер қозғалып отырды. Жастық шағын мәнді де, мағыналы етіп өткізіп, ұлтының мақтанышына айналған алаш арыстарының қанатты сөздерінен алар өнегеміз мол болды.
Елбасы Н.Назарбаев 2018 жылы 5 қазанда Қазақстан халқына арнаған Жолдауында «Келесі жылды Жастар жылы деп жариялауды ұсынамын» деген болатын. Соған орай Таугул-3 мешіті жанынан құрылған «Жәрдем»қайырымдылық қорының жастар жылына қосар үлесі қомақты болмақ дегіміз келеді.
«Жәрдем» – жап-жас жауқазындардан құралған қор. Бір жыл ішінде 1,5 миллион көлемінде қаражаттың басын қосып, көптеген мұқтаждың қажетін өтеген «Жәрдем» қорының жұмысына Алладан береке сұраймыз!
Алматы қаласы Орталық мешітінің баспасөз қызметі
Қызықты тақырыптар
Намаз уақыттары 
.png)
