Алматы қаласы мешіттерінің жылдық есеп беру жиыны өтті (ФОТО)

Жиынды Алматы қаласының бас имамы Еркінбек қари Шоқай сөз сөйлеп жүргізіп отырды.

Бас имам өз сөзінде, ҚМДБ-ның төрағасы, бас мүфти Серікбай қажы Ораз хазреттің қолдауымен, Алматы қаласы бойынша жыл басынан бері атқарылған шаралар мен игі бастамаларға тоқталды. Сондай-ақ, осы ретте бір жағадан бас, бір жеңнен қол шығарған ымырашылдықтың арқасында қызмет атқарып жүрген мешіт имамдарына алғыс білдіріп, алдағы уақытта атқарылуға тиісті жоспарларды да тілге тиек етті.

Одан кейін Наурызбай мен Медеу аудандарының бас имамдарына кезекпен сөз берілді. Олар өз аудандарына қарасты мешіттердің жыл бойы атқарған шаралары, жасаған қайырымдылық жұмыстары, оқу-ағарту бағыттары бойынша баяндама оқыды.  

Жиын барысында Алматы қаласы Орталық мешітінің наиб имамы Ермек Көкірекбаев жастар жылы бойынша атқарылған жұмыстың есебін таныстырса, Орталық мешіт ұстазы Серік Ахметов қала мешіттерінің жұмыстарына сараптамалық баяндама жасады.

Қорытынды сөздің тізгінін қолына алған Бас имам жыл бойы атқарылған шараларға оң бағасын беріп, тиісті сын-ескертпелерін де айтты.

Жиын соңында Бас имам Алматы қаласында асыл дініміз – Исламның дамуына үлкен үлес қосып, дін жолында үлгілі қызмет етіп жүрген бірқатар мешіт қызметкерлеріне Алғыс хаттар табыстады.

Біріншіден, әкімшілік-ұйымдастырушылық, кадрмен қамтамасыз ету бойынша,

Қала мешіттерінің барлығы да имамдармен қамтамасыз етілген. Сонымен қатар, қала имамдарымен келісілген «Әр мешітке бір қари» жобасы бойынша, 35 мешіт қари қызметкерлермен қамтамасыз етілді.

Осы жылы қала әкімдігінің және жергілікті кәсіпкерлердің қолдауымен Алматы Орталық мешіті мен қаламыздың 16 мешітінің ауласы толық күрделі жөндеуден өтті.

Екіншіден, уағыз-насихат жұмыстары және Жастар ісі бойынша,

Қалада биылғы жылы 36212 шара өткізіліп, 1 853 390 адамды қамтыды.

Бас мүфти Серікбай қажы Ораз хазреттің қолдауымен осы жылдың сәуір айында Құран кәрімді жатқа және мәнерлеп оқудан VIII республикалық жарысы 4 номинация бойынша ұйымдастырылды. Бас жүлдеге жеңіл автокөлік тігілді.

ҚМДБ-ның ұйымдастыруымен 17-қарашада  Республика сарайында 5 мың көрерменнің қатысуымен «ӘЗ ПАЙҒАМБАР ХАҚ ЖОЛЫ» атты мерекелік мәуліт кеші өткізілді. Ханафи мазхабының үлкен ғалымы Биркауидің «Әз пайғамбар хақ жолы» атты кітабы кешке келген халыққа үлестірілді.

Үшіншіден, жат ағыммен күрес жұмысы бойынша,

Бұл бағыттағы жұмыс Алматы қаласы Қоғамдық даму  басқармасымен, қаладағы Түзету және басқа да құзіретті мекемелермен бірлесе отырып 5547 кісіге түсіндіру жұмыстары жүргізілде.

Төртіншіден, сауат ашу курстары мен оқу-ағарту бойынша,

Биыл мешіттерімізде 7218 адам діни сауатын ашты.

Жасөспірімдердің жазғы каникулында ұйымдастырылған курстарға 2239 (1563 ұл, 676 қыз) бала қатысты. Бұлардың арасынан 62 талапкер ҚМДБ-ға қарасты оқу орындарына жолданды.

Орталық мешітте қыз-келіншектерге арналған тігін курсы жұмыс жасауда. Бүгінде 17 әйел кісі 4 айлық тігін курсын тамамдап, растайтын сертификаттарға ие болды.

Байкен мешітінде «Балапан қари» Құран жаттау орталығы ашылды.

Бүлдіршіндер арасындағы ІІІ Құран жарысы өтті.

Мешіт қызметкерлерінің аттестациясы және жергілікті биліктің қолдауымен мешіт қызметкерлерінің біліктілігін арттыру бағытында 41 семинар өткізілді.

Бесіншіден, қайырымдылық бағыты бойынша,

Биыл жыл басынан бұл бағытта 1543 іс-шара өткізіліп, 332 609 әлеуметтік аз қамтылған отбасылар мен тұлғаларға жалпы соммасы 350 млн теңгені құрайтын көмек көрсетілді.

Алматы Орталық мешітінің ұйытқы болуымен былтырдан бері жұмыс жасап жатқан «Молдақасым ата уақып» асханасында әр күні 400 кісі, бір жылда 146 мыңға жуық мұқтаж жан ыстық тамақпен қамтамасыз етілді.

Бас мүфти хазіреттің тапсырмасына орай, «Арысқа жылу» қайырымдылық акциясы ұйымдастырылып, Арыс тұрғындарына 15 тоннаға жуық заттай, 6-млн теңге шамасында қаржылай жәрдем жөнелтілді.

Республикалық «Мектепке жол» акциясы аясында «Құрбан айт» мерекесінің қарсаңында 1000 балаға оқуға қажетті құрал-жабдықтармен толтырылған мектеп сөмкелері және «Құрбан айт құтты болсын!» атты тәттілермен толтырылған айттық сыйлық қорапшалары үлестірілді.

Медеу ауданы Аманқұл ата мешіті жанынан «Көк-Төбе», Алатау ауданы Бекет ата мешіті жанынан «Шаңырақ», одан соң, «Қарағайлы», «Арафат», «Қайрат» мешіттерінің қайырымдылық мекемелері ашылды.

Алтыншыдан, баспа өнімдерін шығару бойынша,

ҚМДБ-ның "Имам Мәтуриди" ғылыми-зерттеу орталығы әзірлеген «Әз пайғамбар хақ жолы», «Ислам әдебі», «Қасиетті Құран кәрімнің артықшылығына қатысты қырық хадис», «Республикалық Құран жарыстың фототарихы» кітаптары 17 000 тираж таралыммен жарық көрді.

Жетіншіден, БАҚ-тағы жұмыстар бойынша,

Алматы қаласы мешіттерінің дін қызметкерлері БАҚ беттерінде 92 ғылыми-танымдық материалдар жарияланды.

Жыл басынан бері azan.kz сайтына 2 млннан астам кісі кіріп, пайдаланған. 3,5 мыңнан астам сұраққа жауап берілді. 451 аудио-бейне материалдар жарияланды. Zero.kz рейтингтік жүйесінде Қазақстандық көшбастаушы 3000 сайттың арасында azan.kz сайты үздік 20-ның қатарында өзін көрсетуде.

Сонымен қатар осы бағытта барлық мешіттер facebook, Инстаграмм секілді әлеуметтік желіде өз парақшаларын ашып жұмыс жүргізуде.

 Алматы Орталық мешітінің баспасөз қызметі