АЛМАТЫ ОРТАЛЫҚ МЕШІТІНДЕ ИЖАЗА БЕРУ РӘСІМІ ӨТТІ

Алматы Орталық мешітінде қариларға ижаза беру салтанатты рәсімі өтті. 19 қариға арнайы сертификат табысталды.
Игі іс-шараға Бас мүфти кеңесшісі, ҚМДБ Стратегиялық талдау және даму бөлімінің меңгерушісі Смайыл Сейтбеков, Алматы қаласының бас имамы Төлеби Оспан, ұстаз Ибраһим Шағбан әл-Муршиди әл-Әзһари, Астана қаласынан арнайы келген «Хусамуддин әс-Сығанақи» ислам институтының директоры Бағдат Маханұлы және имамдар мен шәкірттер қатысты. Қаладағы «Хусамуддин әс-Сығанақи» қарилар дайындау ижаза орталығында 2024-2025 оқу жылы барысында 19 шәкірт қари атанып ижазасын алды. Оның 14-і - Асым қырағаты (2 риуаят бойынша), 3 қари - Әбу Жағфар қырағаты (2 риуаяты бойынша), 1 қари - Ибн Кәсир, 1 қари - Әбу Амр әл-Басри қырағаттары бойынша ижаза алды. Ижаза берген ұстаз - Ибраһим Шағбан әл-Муршиди әл-Әзһари.
«Құран ижазасы» – тізбегі ардақты Пайғамбарымыз Мұхаммедтен (оған Алланың салауаты мен сәлемі болсын) бастау алатын қарилардың ережеге сәйкес Құранды оқуы мен толық есте сақтауын куәландыратын құжат. Қарилардың алған білімі екі дүниеде де дәрежелерін көтеріп, жаттаған Құранын әрдайым есте сақтап жүрсін деп тілек тіледі.