КВАДРОБЕРДІҢ ШАРИҒАТТАҒЫ ҮКІМІ
Квадробер[1] – бұл жануардың сыртқы түрін (бейнесін) көрсететін бетперделерді, құйрығы мен құлақтарын тағып алып, жануардың іс-қимылдары мен әдеттеріне еліктеп, солар сияқты өмір кешетіндер.
Алла Тағала адам баласына ақыл мен сана беріп, ардақтап, басқа жаратылыстан ерекшелеп, ең көркем бейнеде жаратты. Алла Тағала Құранда:
وَلَقَدْ كَرَّمْنَا بَنِي آدَمَ وَحَمَلْنَاهُمْ فِي الْبَرِّ وَالْبَحْرِ وَرَزَقْنَاهُمْ مِنَ الطَّيِّبَاتِ وَفَضَّلْنَاهُمْ عَلَى كَثِيرٍ مِمَّنْ خَلَقْنَا تَفْضِيلا
«Біз Адам балаларын ардақты етіп, құрлықта да, теңізде де (емін-еркін) жүргіздік. Һәм таза (адал) азықтарды ризық етіп бердік. Сондай-ақ оларды жаратқан нәрселеріміздің көбінен әлдеқайда үстем еттік»[2], – деген. Келесі аятта:
لَقَدْ خَلَقْنَا الْإِنسَانَ فِي أَحْسَنِ تَقْوِيمٍ
«Шын мәнінде, біз адам баласын ең көркем бейнеде жараттық»[3], – деген.
Демек, бұл аяттардан түсінетініміз, адам баласының жануарға еліктеп, сол дәрежеге түсуі, төрт аяқтап жүруі, өзін ардақтау емес, қорлау болып саналады. Тіпті адам баласының жануарға еліктеуі түгілі әйел кісінің ер адамға, ер кісінің әйелге еліктеуінің өзі шариғатымызда тыйым салынған[4].
Сондықтан жануарларға тән сипаттарға (ит сияқты үру, есек сияқты ақыру т.с.с.) әдейі еліктеу, төрт аяқтап жүріп, олардың тамағын жеу, іс-қимылдарын істеу Алла Тағаланың жаратқан жаратылысын өзгерту болып табылады.
Ал батырды арыстанға, айлакерді түлкіге, сабырлыны түйеге теңеу, сол секілді театрлық қойылымдар, балаларға арналған ойындар т.б «квадробердің», яғни адамның жануарға еліктеуіне жатпайды.
ШЕШІМ:
Квадроберге, яғни жануарлардың деңгейіне түсіп, оларға еліктеп дауыс шығаруға, іс-қимылдарын жасауға шариғат бойынша қатаң тыйым салынады.
ҚМДБ Ғұламалар кеңесі
[1] Квадробика – «квадро» (төрт) және «аэробика» деген сөздердің қосындысынан шыққан. Бұл – балалар мен жасөспірімдер арасында таралған теріс үрдіс. Түпкі мағынасы – жануарларға ұқсап төрт аяқтап жүгіру.
[2] «Исра» сүресі, 70-аят.
[3] «Тин» сүресі, 4-аят.
[4] Имам Бұхари № 5885.
 Предыдущий |
Следующий |
| ҚОҒАМДА МҰСЫЛМАННЫҢ РӨЛІ МЕН ЖАУАПКЕРШІЛІГІ | КИБЕРБУЛЛИНГТІҢ ҮКІМІ |
Қызықты тақырыптар
Намаз уақыттары 
