КӨРШІҢІЗБЕН ТАТУСЫЗ БА?
Алла Тағала адам баласын қоғамда, адамдармен бірге өмір сүруге бейім етіп жаратқан. Жаратылысы адаммен тығыз байланысты жандардың бірі – көрші.
Қасиетті Құран мен сүннетте көршіге жақсылық жасау, оған зиян келтірмеу, тіпті көршінің көңілін аулап отыру – мұсылманның міндеті ретінде айтылған. Дана ата-бабамыз көрші хақында: «Алыстағы ағайыннан жақындағы көршің артық», «Көрші ақысы- тәңір ақысы»,- деп, көршінің қадір қасиетін түсіндіріп кеткен. Өкінішке қарай, бүгінгі қоғамда көршіге деген қадір-құрмет, ізет пен сыйластық біртіндеп әлсіреп барады. Бүгінде өз көршісін танымайтын, көршіге сәлем бермейтін, болмаса ренжіскен күйде ұзақ уақыт бойы сөйлеспейтіндер кездесуде. Бұл – мұсылмандық әдепке мүлде қайшы іс!
Алла Тағала қасиетті Құранда былай дейді: «Аллаға ғана құлшылық етіңдер, Оған ештеңені серік қоспаңдар. Ата-анаға, туыстарға, жетімдерге, міскіндерге... жақын көршіге де, бөгде көршіге де жақсылық жасаңдар...» (Ниса сүресі, 36-аят) Аятта Алла Тағала көршіге жақсылық жасауды ата-анадан кейін атап өтуде. Бұл көршімен жақсы қарым-қатынастың діндегі маңызын көрсетеді.
Алла Елшісі Мұхаммед (оған Алланың салауаты мен сәлемі болсын) көрші жайында былай деген: «Жебірейіл (ғ.с) көршіге жақсылық жасау жайында көп өсиет еткені соншалықты, мен оны (көршіні) мұрагер болады деп ойлап қалдым» (Бұхари, Әдеп, 28; Мүслим, Бирр, 140)
Мұсылман адам көршісімен қарым-қатынасын үзбеуі керек. Қандай да бір себеппен арада реніш болса, оны ұлғайтпай, қайта кешіріммен шешкені абзал. Пайғамбарымыз (оған Алланың салауаты мен сәлемі болсын) басқа хадисінде былай деген: «Аллаға ант етейін, ол (адам) иман келтірмеген. Аллаға ант етейін, ол иман келтірмеген. Аллаға ант етейін, ол иман келтірмеген», – деді. Сахабалар: «Кім ол, Уа, Алланың Елшісі?», – деп сұрағанда, ол: «Көршісі оның кесірінен аман болмайтын адам», – деп жауап берді. (Бұхари, Әдеп, 29; Мүслим, Иман, 73)
Көршіге тіл тигізу, оны мазақ ету, тіпті отбасына тиісу – исламда қатаң тыйым салынған. Ондай адам тіпті толыққанды иман иесі бола алмайды делінген. Пайғамбарымыз (оған Алланың салауаты мен сәлемі болсын) тағы бір хадисінде: «Кімде-кім Аллаға және ақырет күніне иман келтірсе, көршісіне зиян тигізбесін» (Бұхари, Әдеп, 31)
Мұсылман адам көршісіне әрдайым мейірімді, көмектесуге дайын, амандығын сұрап, қажет болса қол ұшын созатын жан.
Қорыта айтқанда көршіңізбен тату болу – дініміздің, дәстүріміздің де талабы. Көршімен жақсы қарым-қатынаста болу – иманның белгісі. Қазіргі таңда ұсақ-түйек себептермен көршімен ренжіскен жандар көп. Алайда дүниенің өткінші, ал ақыреттің мәңгі екенін ескерсек, ренішті кешіріп, татуласу – сауапты іс. Ендеше, араздықты доғарып, көршімізге алғаш болып сәлемдесейік, оған дұға етіп, амандығын тілейік! Тіпті болмашы бір тәттімен барып, ризашылығын алып, қарым-қатынасты нығайтайық. Бұл – Алланың разылығына апаратын ізгі жол.
Уа, Алла! Жүректерімізді біріктір, арамызды тату ет, көршімізге жақсылық жасайтын ізгі пенделеріңнен қыла гөр!
«Нұр-Мүбарак» мешітінің наиб имамы
Әшім Әли Зайдаұлы
Предыдущий
Қызықты тақырыптар
Намаз уақыттары 
