ХАЛАЛ ТУРИЗМ ЖАЙЛЫ НЕ БІЛЕМІЗ?
Адамзат баласы жер жүзін аралап, табиғаттың әсемдігін тамашалап, жаңа өркениеттермен танысуды ежелден қалаған. Бірақ мұсылман жүрегі қай сапарда да Алланың разылығын іздейді. Сол себепті соңғы жылдары дүниежүзінде «халал туризм» деген жаңа ұғым қалыптасты. Бұл – жай ғана демалыс емес, рухани тыныштық пен адалдыққа негізделген саяхат мәдениеті. Мұсылман баласы саяхатта жүрсе де, тіршілікте жүрсе де адал жолдан айнымай, ризығын таза нәрседен іздеу парыз. Себебі, қасиетті Құранда Алла Тағала: «Әй, адамдар! Жер бетіндегі халал әрі таза нәрселерден жеңдер» Бақара сүресі, 168-аят) – деп әмір етеді. Демек, Жаратушы Иеміз ескерткен әмірді естен шығармай арқылы, халал туризмнің айрықша белгілерін әрдайым назарда ұстау қажет. Яғни,
- дастархандағы ас – адал, ішімдіксіз;
- қонақүй бөлмесінде құбыла бағыты көрсетілген, қасиетті Құран данасы бар;
- намаз оқуға арнайы орын бөлінген;
- ер мен әйелдің абыройы сақталардай, бөлек жағажай мен бассейндер ұйымдастырылған;
- қызметкерлердің киімі де, мінезі де шариғат талаптарына сай болуы
деген секілді т.б шарттардың сақталуын бағамдау. Өйткені, Пайғамбарымыз (оған Алланың салауаты мен сәлемі болсын) хадисінде: «Адал айқын, арам да айқын. Ал екеуінің арасында күмәнді нәрселер бар. Кім күмәндіден сақтанса, дінін де, арын да қорғаған болады» (Бухари, Муслим) деп, үнемі рухани һәм физикалық тұрғыда таза болуға үгіттеген. Сондай-ақ, бұл хадис мұсылман баласының демалысы да дін шеңберінен шықпай, ар-намысын сақтайтын ортада өтуі керектігін меңзейді.
Соңғы жылдары әлем елдеріндегі халал туризм саласы қарқынды дамып, әлем назарын аударуда. Оның көш басында – Біріккен Араб Әмірліктері тұр. Себебі, мұнда шариғат талаптарына сай қызмет көрсету сапасы, мұсылман туристердің көптігі және ақпараттық жұмыстардың жүйелілігі басты өлшем болды. Келесі орындарда – Түркия мен Малайзия мемлекеттері. Одан өзге жалпы исламдық туризм индексінде – Индонезия алға шықты. Аталған саланы жіті бақылаушы сарапшы мамандардың айтуынша, 2024 жылға қарай мұсылман туризм нарығы 274 млрд долларға жетпек. Бұл – халал туризмнің жай ғана үрдіс емес, болашақтың үлкен индустриясы екенін дәлелдейді. Мысал ретінде Индонезиядағы Airy қонақ үйлер желісін айтатын болсақ,ол қызмет орнында:
- әр бөлмеде намазға жайылған жайнамаз, құбыланы көрсететін белгі,
- ас мәзірі түгелдей халал сертификатталған,
- қонақтардың ресми некеде екендігі тексеріледі.Осы тәртіп – ел халқының 60%-ына жаққан. Яғни, бұл халал туризмнің мұсылманға ғана емес, жалпы қоғамға тәртіп пен тазалықты үлгі етіп отырғанын көрсетеді. Ендеше, халал туризм саласын насихаттап, оны іс жүзінде жүзеге асыру бізге не береді? Соған тоқталып өтейік:
Біріншіден, рухани тәрбие көзі дәріптеліп, сапарда жүріп иманды ұмытпауға үйретеді.
Екіншіден, отбасыны сақтайды – адал ортада ата-ана мен бала бірлігін күшейтеді.
Үшіншіден, мәдени ықпал етеді – ислам өркениетін өзгелерге танытады.
Төртіншіден, экономикалық өркендеуге үлес қосады – миллиардтаған айналым жасап, жаңа жұмыс орындарын ашады. Сол арқылы мұсылманға ғана емес, жалпы адамзатқа ізгілік пен тазалықтың үлгісі.
Халал туризм – сән үшін пайда болған ұғым емес. Бұл – тақуалықтың, адалдықтың, рухани тыныштықтың жолы. Ол мұсылман жүрегіне: «Дүние қызығын көрумен бірге иманды қорғауға да болады» деген ой сіңіреді. Бұл жайлы Алла елшісі (оған Алланың салауаты мен сәлемі болсын) былай дейді: «Кім Алланың разылығы үшін сапарға шықса, оған әрбір қадамы үшін сауап жазылады» (Табарани).
Ендеше, мұсылман үшін халал туризм – тек демалыс емес, сауапқа толы саяхат, иманға серік болған жол серігі.
Алла Тағала баршамызға өмірі асыл дінмен өрілген салиқалы құл болуды нәсіп еткей!
«Ақсай» мешітінің бас имамы
Серікхан Ахмадиев
 Предыдущий |
Следующий |
| Шарапаты мол шағбан айы | КӨРШІҢІЗБЕН ТАТУСЫЗ БА? |
Қызықты тақырыптар
Намаз уақыттары 
